Møte i april 2016

Nordhordland Litterære Selskap skal lese Hilde K. Kvalvaag si bok Lev vel, alle til neste møte som er den 21. april kl.19.00 på Meland bibliotek. Hilde K. Kvalvaag har for det meste skrive bøker for ungdom, bøker ho har fått prisar for. Den første boka for vaksne skreiv ho i 2008

Det er verd å merke seg at Marit Eikemo og Hilde Kvalvaag kjem på Meland bibliotek den 11. april kl.19.00 og der skal ha ein samtale kalla "Mor-barn-undersøkingar". Dette trur vi vert eit spennenda møte og noko de ikkje bør gå glipp av.

Velkommen til biblioteket både den 11. april og 21. april, det skjer alltid noko kjekt på biblioteket!

Finne ly - alle leiter etter ly - eit trekk i tida?

Boka til Aina Basso fekk dei frammøtte i Selskapet til å hente fram superlativa når det gjaldt språk og personskildring. For dette var ei bok som var lett å lese og samstundes lærte vi noko om tida (1849) og om dei reisande sin posisjon i samfunnet - eller mangel på posisjon. Vi hadde vel alle tenkt at Eilert Sundt var ein framsynt mann, men måten han skriv om dei reisande og dei som opnar heimane sine for dei fekk det til å grøsse i oss.
Boka handlar om Hanna som kjem til ein liten gard langt inne i skogen for å søkje teneste. Ho har fått eit tips av handelsmannen om ein mann med to søner som treng nokon til å stelle for seg. Det passar Hanna godt å leve langt vekk frå folk, for ho har rømt frå tukthuset og er av dei reisande si slekt. Ho får arbeid hos mannen og dei to sønene Johannes og Harald, kona og mora døde for ei tid sidan og huset ber preg av at ingen har teke husarbeidet på alvor. Hanna får god kontakt med Johannes og etter kvart eit nært forhold. Harald er glad i flaska og ganske brutal. Vi får vite meir om Hanna gjennom korte tilbakeblikk, noko som utfyller bilete av kven ho er.

Selskapet slo fast at dette er eigentleg ei ganske enkel historie, far, to søner, ei jente. Johannes var sterkt knytta til mora og er ein skjør person som har ei stor utfordring i å takle broren Harald og hans veremåte. Johannes føler sterkt for Hanna, men er han forelska i henne? Ho vert kanskje ei som kjem i staden for mora?
Boka er sett saman av korte stykke, fine naturskildringar, vi snakka om at vi følte vi vart kjende med personane. Alle leiter etter ly, tryggleik - slik som mange av dei som er på flukt i våre dagar. Vi hadde eit sveip innom haldningar til romani, reisande og splinten som fleire i Selskapet kjende att frå sin barndom.
Vi prøvde å komme fram til eit høgdepunkt, det var vanskeleg å finne, men det positive var at vi kom raskt inn i handlinga og forfattaren lager ei fortetta, sterk stemning gjennom heile boka.
Vi stilte spørsmål ved slutten, var det nødvendig med ein så dramatisk slutt? Litt påklistra kanskje?
Men alt i alt ei bok vi gjerne kan anbefale!

Møteoversikt våren 2016

Det har vore etterlyst i sosialemedia og rett over skranken, eit oversyn over kva for møtedatoar som er sett opp i dette fortreffelege Selskapet. Og her er datoane og staden vi skal treffast:
3. mars - Meland bibliotek
21. april - Meland bibliotek
26. mai - Lindås bibliotek


 Frammøte tidspunkt er kl.19.00 og vi reknar med at vi er ferdig snakka ca kl.20.30.
Vi bestemmer kva som skal lesast frå gong til gong, slik at dei som møter opp kan verkeleg vere med å bestemme kva for bøker vi skal ta for oss. Biblioteka prøver så langt det er mogeleg å låne inn bøkene. Har du spørsmål, ta kontakt med Lindås eller Meland bibliotek.
Velkomne!

Møte i mars

Det er rett nok eit par veker til Selskapet skal samlast neste gong, men det er grunn til å minne om at vi skal snakke om Aina Basso si bok Finne ly
Aina Basso er historikar ved sida av forfattarskapen og ho har skrive bøker både for ungdom og vaksne.
Vi skal snakke om romanen Finne ly torsdag 3. mars kl.19.00 på Meland bibliotek. Vil du vere med er det berre å møte opp. Har du lyst til å lese boka, ta kontakt med Lindås eller Meland bibliotek.
Velkomne!

Livet er meir komplisert enn ein dom

Vi starta året med å samsnakkast om Barneloven av Ian McEwan. Dette var ei bok som greip oss alle og som ga oss mykje å snakke om. Boka handlar om Fiona Maye, ho er dommar med familierett som spesialområde, ho bur i lag med mannen sin Jack og dei har vore gift i mange ti-år og er barnlause. Boka startar med at Jack vil ha Fiona si godkjenning på at han kan ha eit sidesprang og dette er opptakten til eit turbulent privatliv i den tida vi følgjer dei, ved sida av at Fiona får ei vanskeleg hastesak i retten.
Samtalen i Selskapet starta faktisk med: Trur de han var utru? Synest han at han hadde "rett til" å vere utru sidan Fiona berre var oppteken av sakene sine og ikkje såg hans behov?
Fiona er dyktig, ho har arbeidd målmedveten for å kome dit ho er i dag. Eigne barn har ho utsett så lenge at det ikkje er aktuelt no, men dei har mykje kontakt med andre barn i storfamilien. Saka ho får handlar om ein gut, Adam på 17 år som treng blodoverføring for å overleve, men både han og familien er medlem i Jehovas Vitne og dei aksepterer ikkje den slags behandling. Fiona reiser til sjukehuset der guten ligg og det oppstår eit spesielt forhold mellom dei. Han fortel henne om sine tankar, han skriv dikt og spelar fiolin. Fiona er og ein god pianist og dei les og syng saman. Møtet med Adam skaper eit stort engasjement og sterke kjensler hos henne.
Selskapet diskuterte ekteskapet mellom Fiona og Jack - ho utsett, han tenker på sine behov, dei hadde på eit vis kome inn i "ein tralt", spenninga i ekteskapet var ikkje der lenger. Forfattaren set den private Fiona opp mot dommaren Fiona. Vi merka oss at Fiona oppsøkte Adam på sjukehuset, noko som i dag er særs uvanleg og ho går over streken når det gjeld relasjonen til han.
Vi var og innom blodoverføringa som eit livreddande middel. Forfattaren skriv nyansert og fint om dette, vi skjønar det ikkje - men forfattaren får fram dilemaet.
Boka var lett å lese med godt språk. Det var litt mange detaljar og det hadde vore kjekt med eit kart over London.
Den gode Odd W. Surén har skrive eit fin melding i Dag og tid, som og tok oss tid til å lese.
Selskapet anbefaler Barneloven og med den fleire bøker frå handa til Ian McEwan, det er fleire av oss som nok les boka ein gong til.

Nytt år og nytt møte!

Endeleg er det møte igjen i Nordhordland Litterære Selskap! Torsdag 21. januar kl.19.00 på Lindås bibliotek i Knarvik skal det samsnakkast om Barneloven av Ian McEwan. Har du lyst til å vere med? Ta kontakt med biblioteka i Meland eller Lindås eller møt opp. Velkomne!

Novembermøte

Det vart lenge mellom møta i Selskapet denne hausten, men når vi kjem til 12. november Kl.19.00 skal vi samlast på Lindås bibliotek i Knarvik.
Boka vi skal samtale om er Emma Healey si bok Elizabeth er borte er bok som stort sett ikkje har kvilt i bibliotekhyllene, men har vitja mange heimar og vorte lesen med stor innleving skal vi tru rapportane.
Denne boka er Emma Healey si første bok, det er alltid spennande med debutantar, så dette er noko å sjå fram til!
Har du lyst til å vere med å snakke om boka? Ta kontakt med biblioteka!