Vi er våre val

 

Det var godt oppmøte då Selskapet samla seg for å snakke om septemberboka Det som forsvinner av Brit Bennett. Det første spørsmålet som vart stilt var: Er det mogeleg å gå som kvit? Vi snakka litt om fenomenet passing noko som er eit viktig tema i denne romanen.

Boka handlar om tvillingsøstrene Desiree og Stella som veks opp i ein bitteliten by i Sørstatane. I denne byen bur det svarte med lys hud og nokre av dei mellom anna Stella kan gå som kvit. Søstrene opplever at faren deira vert drepen av ein gjeng kvite menn som trenger seg inn i huset deira. Mora vert åleine og må forsørge seg og jentene med vask og husarbeid for andre. Jentene er flinke, men det er ikkje snakk om noko collegeutdanning for no treng mora hjelp for å få endane til å møtast. Stella kjenner på lengta etter å lære meir, medan Desiree er meir oppteken av å komme seg vekk frå byen og alt som er der. Ein dag set dei seg på bussen og reiser til New Orleans. Dei er ikkje meir enn seksten år, og veit lite om livet utanfor heimbyen. Dei får jobb og eit lite krypinn. Det er hardt, men dei er fulle av pågangsmot. Stella går på et kunstmuseum ein dag det berre er inngang for kvite og hun vert ikkje stansa. Denne opplevinga får ho til å føle ein form for friheit som hun ikke har kjent på tidlegare. Hun søkjer på ein jobb som sekretær i et kvitt firma, der den eineste kvalifikasjonen er at hun har ei vakker handskrift. Ho er kvalm av angst for å verte avslørt som svart, men ho får jobben. Desiree ertar henne, men Stella ser på dette som ein opning til å komme seg vekk. Sjefen ber henne bli med til Boston og ho takkar ja. Ho reiser utan å gje melding til Desiree og forsvin ut av livet hennar. Desiree er fortvila og lei seg. Ho leiter etter Stella, men ho er og blir borte. Desiree flyttar til Washington der ho får arbeid som fingeravtrykklesar for FBI. Ho treff Sam som er advokat, kolsvart og skal det vise seg særs voldeleg. Dei får ei jente, Jude, som er like mørk som faren, men etter fleire episoder der Sam heldt på å slå henne helselaus, rømmer ho med Jude til mora som framleis bur i heimbyen. Desiree treff igjen ein mann som ho var forelska i då ho var ung og dei vert kjæraster. Vi møter igjen Stella som nå bur i Los Angeles i eit særs pent kvitt område. Ho nyt å gjere ingenting, men alt endrar seg då ein svart familie flyttar inn i nabohuset. Bustadforeininga er i opprør og Stella er også med på at dei absolutt ikkje må få flytte inn. Det vert likevel slik at dei flyttar inn og Stella vert venn med kona i huset. Dei er mykje saman og ryktene går. Stella passar på hun berre er saman med si fargede nabo og dattera når dei ikkje vert sett av andre. Dette fører til ein konfrontasjon og Stella er igjen einsam. Stella og mannen har ei datter som liknar faren, svært lys med blå auge. Dattera, Kennedy, veks opp og begynner å stille spørsmål om mora sin barndom, men Stella vik unna. Jude har begynt på UCLA, men treng pengar og tek ekstrajobbar. På ein av disse treffer hun Kennedy og då hun ser mora, Stella, raser alle historiane om den forsvunne tvillingsøstera inn over henne.

Selskapet snakka om val, det å velgje vekk familie og i særleg grad å velgje vekk ei tvillingsøster. Korleis er det eigentleg mogeleg? Stella tviheldt på sitt kvite liv. Ho elskar fridommen det gjev ho og det gode livet ho har med mannen sin. Ho velgjer eit liv som set sterke grenser for kva ho kan gjere og kven ho kan vere saman med. Desire på si side er sjuk av lengsel etter Stella, leitar og set kjærasten til å leita også. Det er Jude som finn Stella, men ho vil ikkje ha kontakt med henne og ho vil ikkje at Jude skal ha kontakt med Kennedy dattera hennar. Dette er ei historie om sterke damer og om identitet. Kven vil du vere? Kven kan du vere og kva for val tek du? Selskapet var innom klasseskilje i det amerikanske samfunnet, men og korleis nordmenn har behandla samar og tatarar opp i gjennom tidene. Vi har ikkje mykje å vere stolte over der. Forfattaren skriv godt syntes Selskapet, men det var episodar vi ikkje syntes var heilt topp. Vi heia på Desire som rømde frå mannen og Stella då ho baka ei kake til naboen sin, var det ei opning til endring? Det vart jo ikkje slik, men det var ei gripande scene. Det var ei kjekk bok å lese syntes dei fleste i Selskapet og kan anbefalast til andre for her lærte vi noko om forholda i USA på 1960-talet, det var nyttig.

Møtekalender hausten 2023

 

Første møte i Nordhordland Litterære Selskap er allereie gjennomført, men frykt ikkje - denne hausten er det møte kvar månad!

19. september kl.19.00 samlast vi på Frivilligloftet, Frekhaug og samtalar om Brit Bennet si bok: Det som forsvinner.

24. oktober kl.19.00 samlast vi på Strilabiblioteket, avdeling Knarvik og samatalar om John Boyne si bok: Alt som er ødelagt. Denne boka er ein slags oppfølgjar til boka Gutten i den stripete pysjamasen

21. november kl.19.00 samlast vi på Alver bibliotek, Frekhaug.Då skal vi samsnakkast om to bøker, begge av Olaug Nilssen. Det er Tung tids tale og Yt etter evne, få etter behov.

19. desmber kl.19.00 samlast vi på Alver bibliotek, Knarvik. Når det dreg seg mot jul må vi lese ei kosebok og denne gongen skal vi snakka om Tre menn til Vilma av Gudrun Skretting.

Følgj med og ver velkommen til samtalar om bøker!

Gyldig fråver?

 Skrivaren hadde gledd seg til å snakke djupt og lenge om bøkene vi hadde lese i sommar, men når ho er så korttenkt at ho står med  bøgd rygg og hovudet inne i dusjen for å vaske ein lampeskjerm.... Eg seier ikkje meir. Hekseskotet kom like overraskande som før og råda om korleis denne vaskinga burde ha vore utført hagla..Det vart nokre dagar med smertestillande og eit heller roleg liv.

Heldigvis var det andre som hadde oppført seg meir fornuftig enn skrivaren! Dei møttest og kunne melde at Selskapet var nøgde med desse bøkene. Nokre syntes rett nok at det var tungt å lese Stormfulle høgder, for historia vandrar noko fram og tilbake mellom forteljarane. Historia om Cathy Earnshaw og Heathcliff og familiane som vert involvert i deira lidenskap og landskapet som Brontë skriv om er med på å legge ei sterk ramme rundt livet til dei som bur der. Alt dette er med på å gje boka en særskild posisjon i litteraturen. Det er ei bok som vert hugsa lenge.

Den andre boka Selskapet las i sommar var Oliver Twist. Romanen om den foreldrelause guten som først vert plassert på ein barneheim og overlever trass elendige omgjevnader. Han rømmer og treff på folk som vil utnytte han, men han treff og på folk som hjelper han og tek seg av han med stor omsorg. Selskapet syntes at om distansen i år er stor mellom då boka vart skriven og i dag, så er problemstillinga framleis aktuell.

Det er kjekt å lese klassikarar, dei er alltid aktuelle!

Kva skal Selskapet lese sommaren 2023?

 

No satsar vi på ein skikkeleg lesesommar! To sterke klassikarar skal lesast og ikkje minst samsnakkast om på første møtet etter sommarferien.

Selskapet klarte ikkje å avgjere kva for ei bok vi skulle lese, så då vart det to bøker. Vi startar med Charles Dickens: Oliver Twist. 

Har du lese heile boka? Du har ikkje som dei fleste berre lese avkorta utgåver eller sett ein av filmane som er laga om romanen? No les vi heile romanen uavkorta, det vert spannande!

Den andre boka vi skal lese i sommar er Emily Brontë sin einaste, men likevel berømte roman Stormfulle høgder. 

Kven har vel ikkje sett Kate Bush synge denne om kjærleiken mellom Chaterine og Heathcliff?

Det er mykje som skal lesast fram til tysdag den 22. august kl.19.00 då skal Selskapet treffast på Strilabiblioteket, Knarvik.

Velkomne!

Ta kontakt om du vil vere med og lese bøkene!

Femten år; den revolusjonære våren

 

Selskapet hadde sitt siste møte før sommarferien tok oss og boka vi hadde lese var Vigdis Hjorth sin roman: Femten år; den revolusjonære våren. No skal det seiast at skrivaren hadde gløymd å annonsere møtet på bloggen, men andre gode krefter har annonsert både på Facebook og på Instagram, slik at dei frammøtte var nøgde! Kva så med romanen? Vi møter Paula og familien hennar: storesøster Elisabeth, veslebror Lasse, mor og far. Mor er heime, far arbeider på eit rekneskapskontor og Elisabeth går på Kristleg Gymnasium og har den eine vanskelege eksamenen etter den andre. Besteforeldra er kristne og set strenge rammer for familielivet som foreldra føyer seg umælande etter. Paula har ein ild i seg, ein vulkan som vil ha, må ha, utbrot, noko ho er redd for. Ho har ei venninne, Karen, som ho stadig er saman med. Karen kommer frå ein frilynt familie som brukar tid på musikk og kultur og ikkje er så oppteken av kva som høver seg. Vi følgjer Paula frå ho er ti- elleve år og fram til konfirmasjonsdagen. Paula liker det føreseielege, det kjente livet med sine rytmer av middagar, turar, besøk av besteforeldra, reisa til mormor om sommaren. Det er gode minne, ho vil at det skal vere slik, men då ho oppdagar at mor skriv brev til mormor sder ho fortel ei heilt anna historie, vert ho skremd. Er ikke mor nøgd med det livet dei lever? Må ho lage eit nytt liv for dei, slik at mormor kan like dei betre? Frå dette punktet byrjar Paula sjå på familien sin på ein annan måte. Paula er observant og legg merke til ting og undrar seg. Karen flyttar til Bergen og Paula opplever den djupe sorga det er å miste bestevenninna. Så kjem konfirmasjonen med alle sine forventningar og ritual, men Paula kjenner at ho kan ikkje gjennomføre dette. Heldigvis ser presten henne og dei får ein god prat.  Konfirmasjonsdagen kjem, den store prøva for kor vellukka familien eigentleg er og Paula heldt tale.

Selskapet likte boka, var begeistra for Paula og konfirmasjonstalen ho held på slutten av romanen er eit absolutt høgdepunkt! Vigdis Hjorth skriv godt og "sitatvenleg", slik at ein lett kan rote seg vekk frå samtalen og gå inn i kjekke sitat... Fleire hadde og sett dette intervjuet med forfattaren, vel verd å sjå! Vi kan ikkje anna enn å anbefale denne romanen!

Nydeleg, trist og melankolsk

 Dette var orda dei frammøtte i Selskapet starta samtalen med om romanen Barndommens gate av Tove Ditlevsen med. Romanen var Ditlevsen sitt gjennombrot som forfattar. Ho hadde debutert med ei diktsamling, men det var denne romanen som ga ho anerkjenning og opna vegen vidare for ho. Romanen fortel om Ester, broren Carl og foreldra. De bur i Istedsgate, på den tida eit arbeidarstrøk med store bygårder med små leiligheiter. Ester har ei særs god venninne Lise, ho er lita med eit søtt hjartefjes, medan Ester er lang og tynn. Dei er eit umake par, men dei heng saman i barneåra. Dei naskar frå butikken, Lise naskar og Ester spør etter alt mogeleg for å ta vekk merksemda frå Lise. Når Lise meiner at Ester og bør stele, så går det nesten gale for Ester veit i djupet at å stele det gjer ein berre ikkje. Likevel gjer ho slik Lise seier. Ester leiter etter anerkjenning, ei forsikring om at ho og livet hennar er viktig. Det er ikkje lett for Ester mangler ei forståing av sosiale signal.  Et eksempel: Lise og Ester kjem inn til eit par og skal synge litt, men Ester skjønar ikkje når det er nok, ho berre driv på til dei vert kasta ut. 

Selskapet lo litt av dette, men det handlar og om kor usikker Ester kjenner seg i verda. Ho er redd for å leggja seg om kvelden og sovnar ikkje før foreldra er der og ho torer ikkje gå over gårdsrommet av di det kan vere ein mann der. Likevel er det tak i Ester, ho får seg jobb på eit pensjonat, ein jobb ho hatar. Ho riv seg laus, sjølv om ho lyg om grunnen. Ho vert sekretær, men hamnar i ein vanskeleg situasjon der og. Ester veks opp, men vert ho vaksen? Det spurde vi oss om i Selskapet. Ho gjer ting utan å reflektere over handlingane sine og konsekvensane dei vil få. Selskapet meinte at om ho gjorde dette ein gong så var det no så, men det skjer igjen.

Vi snakka om broren Carl som skriv små dikt og legg deit i skuffen, han vert ven med Oskar som teiknar og saman vil dei leve av å skrive og teikne. Carl får utgjeve dikta sine og etterkvart ein roman. Mora er veldig stolt av sonen, men skal ikkje skryte, langt i frå. Vi lurte på om Carl eigentlig var forfattaren sjølv for denne romanen har sterke sjølvbiografiske trekk. 

Det er ei sår forteljing, vi ønskjer at det skal gå bra med Ester, men vi spør oss: vert ho aldri fri for denne gata som har prega barndommen hennar slik? Alle dei frammøtte likte boka og vil gjerne anbefale den. Dei som vil lese meir om Ester kan gå til bøkene Ungdom og Gift.

Møtet i Mai 2023

 

Selskapet held seg til romanar om barndom og oppvekst. Denne gongen skal vi samsnakkast om klassiskaren Barndommens gate av den danske forfattaren Tove Ditlevsen.

Vi møtast tirsdag 23. mai kl.19.00 på Strilabiblioteket, Knarvik. 

Velkomne!